پاکستان میں دریائی کٹاؤ اس سال ہر سال کے مقابلہ میں بہت ہی زیادہ ہو رہا ہے نہ صرف متاثرہ علاقہ کے لوگ اس آفت سے پریشان ہیں بلکہ اتنی شدید زمینی کٹاؤ سے گورنمنٹ کے اداروں میں بھی انتہائی تفشیش ناک صورت حال پائی جا رہی ہے اور اسی کے ساتھ سیاسی حلقہ بھی پریشان نظر آرہا ہے۔ اس کی اصل وجہ موسم کی بے جا بدلتی ہوئی صورتحال ہے اور بے موسمی مون سون بارشوں کا سلسلہ ہے اس سے قبل بارشی سلسلہ 15 جولائی سے شروع ہوتا تھا اور 15 ستمبر تک جاری رہتا تھا اسی سلسلہ کے دوران سیلاب میں شدت آتی اور مسلسل سیلابی ریلے دریائی گزر گاہوں سے ایک سطح کو برقرار رکھتے ہوئے گزر جاتے تھے جس سے دریائی علاقہ جات میں زمینی کٹاؤ کم ہوتا تھا جس وقت پانی دریائی کناروں سے بالکل نچلی سطح پر چلا جاتا تھا تو اس سے زمینی کٹاؤ کا دورانیہ بالکل کم بلکہ چند دنوں کا ہو جاتا تھا جس سے مجموعی طور پر دریا کی دونوں اطراف سے کم ایکڑ اراضی دریا برد ہوتی تھی دراصل دریائی کٹاؤ اس وقت زیادہ ہوتا ہے جب سیلابی ریلے گزرنے کے بعد پانی نچلی سطح پر آرہا ہواور کناروں سے نیچے اتر رہا ہو اس وقت پانی کا بہاؤ بہت تیز ہوتا ہے جس سے زمین کے کٹاؤ میں اضافہ ہو جاتا ہے۔
اب جبکہ موسمیاتی تبدیلیاں ہو ئی ہیں جس کی وجہ سے مون سون بارشی سلسلہ جون کے پہلے ہفتہ سے شروع ہو جاتا ہے اوریہ سلسلہ 15 ستمبر تک جاری رہتا ہے یہ مون سون کی بارشیں ایک ساتھ برسنے کی بجائے وقفہ در وقفہ ہو رہی ہیں ۔جس کی وجہ سے دریاؤں میں پانی کی سطح مختلف وقت میں بلند اور کم ہوتی رہتی ہے۔ایک ہفتہ میں ایک دو بارشیں شدید ہوتی ہیں جیسے پانی کی سطح دریاؤں میں کناروں تک بلند ہو جاتی ہے اور پھر چند دن بارشیں نہیں ہوتی اور پانی اپنی سطح سے نیچے آنا شروع ہو جاتا ہے اور پانی کے بہاؤ کی رفتار میں تیزی آجاتی ہے جس سے زمینی کٹاؤ میں اضافہ ہو جاتا ہے پھر چند دنوں کے وقفہ کے بعد پھر بارشیں ہو جاتی ہیں ۔اسی سلسلہ کی وجہ سے پانی کی سطح میں اتار و جڑھاؤ کافی عرصہ تک رہتا ہے جس سے دریاکا زمینی کٹاؤ ایک لمبے عرصہ تک جاری رہتا ہے اس سال ضلع لیہ میں شدید دریائی کٹاؤ کے ساتھ ساتھ پنجاب اور سندھ کے دوسرے مختلف اضلاع میں بھی ہزاروں ایکڑ اراضی دریا برد ہوئی ہے زرعی زمین اور فصلات کے ساتھ ساتھ کئی انسانی آبادیاں اور گھر بھی دریائی کٹاؤ کی زد میں آئے ہیں ۔نہ صرف فصلات تباہ ہوئی ہیں بلکہ کئی گھرانے بے گھر ہوئے ہیں ۔بلکہ گھرانہ ہی نہیں کئی کئی بستیاں دریائی کٹاؤ کی زد میں آگئی ہیں۔کھڑی فصلوں کی تباہ کاری سے نہ صرف مقامی آبادیاں معاشی بدحالی کا شکار ہورہی ہیں بلکہ خوراک کی کمی کے اضافہ کا سبب بنا ہے ۔دریائی کٹاؤ کے لئے مقامی سطح پر اخباری نمائندے انجم سحرائی نے ڈسٹرکٹ فورم کے ممبران اور دوسری میڈیا ٹیموں کے ہمراہ ان علاقوں کا وزٹ کیا ۔اس تباہ کاری کے عملی اقدام کے لئے حکومت سے درخواست کی ہے اس علاقہ کے متاثرین کو جو بے گھر ہیں اور بے زمین ہیں حکومت ان کو گھر بنانے کیلئے زمین کی فراہمی کرے اور ساتھ گھر وں کی تعمیرات کے لئے تعاون کرے۔
اسی کے ساتھ صوبائی وزیرآفات و بلیات مہر اعجاز احمد اچلانہ نے ہمراہ D.C لیہ متاثرہ علاقہ کا وزٹ کیا اس شدید کٹاؤ سے شکار ہونے والی آبادیوں کو متبادل زمین کی فراہمی کا بھی حکم جاری فرمایا اسی کے ساتھ ضلعی سطح پر مزید امداد کی یقین دہانی بھی کرائی۔

صحرائی علاقہ کے رہائشیوں پر موسمیاتی تبدیلیوں کے اثرات 
ضلع لیہ ،جھنگ اور مظفر گڑھ پنجاب کے ایسے اضلاع ہیں جن کا رقبہ دو طرح کاہے ایک دریائی علاقہ یا نشیبی علاقہ ہے اور دوسرا حصہ صحرائی یا ریتلا علاقہ ہے۔ان اضلاع میں ہمیشہ دو قسم کی آفات کا خطرہ رہتا ہے اگر دریاؤ ں میں پانی زیادہ آئے تو دریائی علاقہ کے لوگوں کے لئے سیلابی آفت بن جاتی ہے۔
ان اضلاع کے صحرائی علاقہ کی فصلات کا انحصار بارشوں پر ہوتا ہے پہلے تو صحرائی علاقہ کے لوگوں کو صرف خشک سالی جسیے آفت کا ڈر رہتا تھا لیکن موسمیاتی تبدیلیوں نے اس علاقہ کے لوگوں کی مشکلات میں مزید اضافہ کرنا شروع کردیا ۔ان موسمیاتی تبدیلیوں کی وجہ سے نہ صرف لوگوں کی غربت میں اضافہ ہو رہا ہے اس کے ساتھ تحفظ خوراک بھی خدشہ کا شکار ہے۔بلکہ خوراک میں واضح طور پر کمی ہو رہی ہے ۔صحرائی علاقہ جات کی اہم ترین فصل چنا ہے یہاں کے مقامی لوگوں کی روزی کا اہم ترین ذریعہ چنا کی فصل ہے اب ان علاقوں میں وقت پر بارشیں نہ ہونے سے اس فصل کی کاشت دیر سے ہونے لگی ہے اسی کے ساتھ ان علاقوں میں اس فصل کی برداشت مارچ کے مہینہ میں مکمل کر لی جاتی تھی پچھلے چند سالوں سے جو بارشیں جنوری کے مہینہ میں ہوا کرتی تھیں اب وہ بارشیں مارچ کے مہینہ میں ہو رہی ہیں۔اس وقت فصل پکنے والی ہوتی ہے اس فصل کو کیڑا لگ جاتا ہے وہ فصل کاکا فی حد تک نقصان کر دیتا ہے جہاں پر ان موسمیاتی تبدیلیوں نے مقامی زمیندار کی فصل کا نقصان کیا ہے وہاں پر زرعی مزدور کی معاشی زندگی کو بھی نقصان پہنچایا ہے ۔اس سے پہلے یہ زرعی مزدور ان علاقوں میں چنے کی فصل کی کٹائی کرتا تھا یہ کٹائی کا سلسلہ مار چ کے مہینہ میں اختتام پذیر ہو جاتا تھا ۔اور پھر گندم کی کٹائی کا سلسلہ شرو ع ہوتا تھا اور یہ مزدور اپریل کے مہینہ میں گندم کے علاقوں میں جا کر گندم کی کٹائی کر کے اپنی گھریلو ضروریات کے لئے سال بھر کی گندم اکٹھی کر لیتا تھا اب جبکہ چنا کی فصل کی برداشت بھی اپریل کے مہینہ تک چلی گئی ہے جس سے یہ زرعی مزدور ایک فصل سے مزدوری حاصل کر سکتا ہے اور دوسری فصل یعنی گندم کی مزدوری سے محروم ہو جاتاہے ۔اس وجہ سے ان علاقوں کے رہائشی زرعی مزدور معاشی بدحالی کے ساتھ ساتھ خوراک کی کمی کا بھی شکار ہو رہے ہیں۔
اس سال 2017 ء ؁ میں ضلع لیہ کی صحرائی تحصیل چوبارہ کی مختلف یونین کونسل میں مارچ اور اپریل کے مہینوں میں انتہائی شدید قسم کی بارشیں ہوئی ہیں جس نے گندم کی کھڑی فصل کی بڑے پیمانے پر تباہی کی ۔صوبائی وزیر آفات و بلیات نے علاقہ کا وزت کیا اور اس علاقہ کو آفت زدہ قرار دیا اور اسی علاقہ کے متاثرہ لوگوں کی مالی امداد کا اعلان بھی کیا۔